Yen

Yen
Land:	Japan
Unterdeilig:	100 Sen, 1000 Rin (historisch)
ISO-4217-Code:	JPY
Abchürzig:	¥ (international), 円 (Japan)
Wechselkurs: (17. Mai 2024)	156 Yen pro US-Dollar 169 Yen pro Öiro

Dr Yen (jap. 円 en, wörtlig runde Gegestand) isch sit 1870 die japanischi Wäärigsäihäit. S internazionale Sümbol für e Yen isch ¥.

Es isch iigfüert worde, die modärne runde Münze in Silber und Gold z Japan iigfüert worde si. Näben em US-Dollar und em Öiro isch dr Yen zur Wäärigsstabilisazion in vile Länder Däil vo de äigene Gäldresärve. Dr Yen wird in Sen (銭, 100 Sen = 1 Yen)^[1] und in Rin (厘, 10 Rin = 1 Sen) iidäilt, aber dr Sen und dr Rin si scho 1954 us em Umlauf gno worde. In dr latiinische Schrift wird s Wäärigssümbol vom Yen dur s Schriftzäiche ¥ und in dr japanische Schriibwiis mit em Kanji 円 daargstellt. D Bezäichnig für e ISO-Wäärigscod isch JPY und het d Codnummere 392. Noch em Änd vom Zwäite Wältchrieg isch dr Yen fest an dr US-Dollar kopplet worde. Dr Kurs zu zu sällere Zit isch 360 Yen pro 1 US-Dollar gsi. Sit dass 1973 s Bretton-Wood-Süsteem zämmebroche isch, wird dr Wärt vom Yen vom Wäärigsmäärt bestimmt. Zur Zit isch dr Wäggselkurs vom Yen öbbe 156 Yen für äi US-Dollar und öbbe 169 Yen pro Öiro.

1. ↑ Professor Dr. Erich Thiess, Schriftenreihe des Instituts für Bank- und Kreditwirtschaft der Freien Universität Berlin, Strukturanalysen ausländischer Banksysteme: Japan, 1971, S. 8